Ulaon Marsiadap Ari, “Sada Ulaon Pangurupion”

Medan, SIMARMATA.or.id – Godang do ulaon nasomal di halak Batak najolo naso adong be tarida di partikkian si saonari on alani godang ni hamajuon namasa ditonga-tonga ni bangso on. Tabahen majo sada tudosan ima “Marsiadap Ari”, molo marsiadap ari antar songon Gotong-royong ma tudoshononna di bahasa Indonesia, alai lobi sian i dope ianggo pangantusionna tarlumobi tu hita halak Batak.

Molo ulaon Marsiadap Ari sasintongna boi dope jumpangta i di piga luat tano Batak songon di Habinsaran/Parsoburan, Pahae tarlumobi di angka luat na godang pansarianna sian hauma, porlak, nang angka parhaminjon songon di Pangkat, Dolok Sanggul, nang di angka huta humaliang Dolok Sihabu-habu. Na gabe sungkun-sungkun di hita, songon dia do tutu ulaon Marsiadap ari i?

Ulaon Marsiadap Ari ima sada ulaon pangurupion sian dongan tubu manang, dongan sahuta manang parhombar jabu rampak pasidunghon sisabion di saba, sidabuon di tombak(haminjon) nang angka parkarejoan na asing di porlak nasida marsorin-sorin manang margonti-gonti laho pasidunghon siulaon i. Ndada adong “gaji” taringot tu Ulaon Marsiadap Ari on alai “Gogo mangalap Gogo” do jala boi do tatudoshon i tu hata “holong mangalap holong”, Alana molo tangkas taparrohahon nda tung na lupa nasida tu “singirna” molo nungnga rampak karejo nasida di porlakna raphon parhombar jabuna, laos di uduti nasida do muse sogotnai manang diari papigahon muse karejo raphon parhombarjabunai di porlakna laho pasuanghon “singirna’ marhite-hite pangurupion sian gogo jala dang maretong-etong hepeng alai luhut do sudenai sian ias ni roha.

Uli situtu do tahe ulaon Marsiadap ari on, on ma sada ulaon napatuduhon hasadaon dohot namasihaholongan jala sian tulus dohot ias ni roha rampak mangkarejohon sada ulaon. Di ulaon i ndang adong rupani na gabe tuan manang mandor, sarupa loja do sarampak maradi uju naung loja. Dao ma tahe sian angka HOTEL (Hosom, Teal, Elat, Late) songon angkau naung masa dipartingkian sisaonari on. Tudos ma rupani tu nanidok ni umpasa:

Hau hariara si dua dakka
Nirahar somarna mate
Molo dung saut do hita sahata
Dao ma tutu angka Hosom, elat, dohot late

Nungnga moru situtu be hasadaon ni angka jolma di partingkian sisonarion, dang adong be rupani roha marsiurup-urupan dohot marsitogu-toguan laho mambahen ruhut-ruhut ni parsaoran. Nungnga godang jolma holan mamingkirhon dirina sambing dang tumagonan halak. Marsiadap Ari ma sada tudosan di hita nuaeng laho mamboto parsadaan dohot parsaoran ni angka natua-tua si jolo-jolo tubu na marsitogu-toguan rupani tarsongon hata na mandok “marsitogu-toguan,marsitungkol-tungkolan songon suhat di robean”. Saroha di tingki karejo, sahata dung laho maradi mangalap gogo. Uli situtu do ulaon naung di pungka angka ompunta sijolo-jolo tubu i jala naeng ma nian tapeop jala taulahon i asa marture parrohaonta ganup.

Sada na gabe siarsakhononta saonari, ima “Marsiadap Ari” on nga mulai mago be sian tonga-tonga ni halak batak. Dang piga taonnai ra “Marsiadap Ari” on di “Museum”hon nama ala dang tarida be bogasna di naung lupa bangso on jala marpanukkun “aha do tutu marsiadap ari i? songon dia do rupani?”. Dang piga halak be tumanda i, angka natua-tuanta parHabinsaran dohot dohot parRura Silindung nama umboto i.

Alai nian nda na mandok na gabe sala dihita i. Umbahen hamajuon zaman on do gabe ingkon tauduti angka na masa nuaeng, ima angka Teknologi, dohot godang na asing jala muse lam godang halak batak mangaranto tumadinghon Bona ni pinasana tu luat sileban. Di luat Sileban on ma tong ditanda nasida angka Adat naLeban, disi ma tarapus jala lupa sasaotik adat Batakna i ala parsaoran dohot angka halak Sileban i. Alai nian molo tung pe tading goar “Marsiadap Ari” i, tabuat ma ianggo apala hinadenggan na i ima: Parsaoran, Hasadaon ni roha, Sahata laho mangula ido na patuduhon boa do sabotulna hita halak Batak taringot tu Parsaoranta na mansai uli. Sai jot-jot do didok natua-tuanta:

Aek godang do tu aek laut
Dos ni rohanta do umbahen na saut

Dos ni roha mambahen uli sada parsaoran jala ala dos ni roha do boi sae parkarejoan di namarsiadap ari i. Ala dos ni roha do adong hata “Marsiurup-urupan” dohot “Marsitungkol-tungkolan” sian i muse asa ro roha holong angkup ni i di endehon Trio Lamtama ma ende “holong mangalap holong”. Di Bibel tarsurat do: “Alai di ginjang ni saluhutna i: I ma haholongan ni roha i; ai ido rahut-rahut ni nasa Harimpason(Kolosse 3:14) manang di Alkitab Bahasa Indonesia didok :”dan diatas semuanya itu: kenakanlah kasih,sebagai pengikat yang mempersatukan dan menyempurnakan(Kolose 3:14).

Boha do muse pambahenanta angka Naposo nuaeng laho pangoluhon hinadenggan ni “Marsiadap Ari” i di ngolunta? Nian asa songon nidok ni umpasa ma:

Ramba-ramba Sipiso
Bahen rahut-rahut ni podoman
Hamu angka naposo
Sai jamot marsitutu ma di parsaoran

Alana umbahen jamot do hita di Parsaoran asa jumpa hasadaon ni roha, di tingki mangula manang aha pe ndang olo marsitundalan manang gabe mandate loja sasahalak, sapala loja rampak loja sude, sapala maradi rampak maradi sude, sapala mengkel rampak mengkel sude. Unang ma nian adong na martongkar, maralo hata, sada disan hundul, sada disan mangula, angkup ni i ndang jumpang be hinadenggan ni “Marsiadap Ari” i. Molo nga gogo rahut-rahut ni parsaoran i jumpa ma tutu “Harimpason” songon nidokni Kolose 3:14 i alai ingkon adong do disi “holong” na pasaorhon sude parrohaon ganup asa jumpa parsaoran “Narimpas” jala marhite-hite i boi ma ta pangolu Hinadenggan ni “Marsiadap Ari”. Ima na ingkon sipeoponta angka Naposo ni Batak asa unang mago hinauli hinadenggan ni parrohaon ni bangso Batak on Maralohon hamajuon ni zaman. Marsiadap Ari ma sada tudos-tudos sian mansai godang nai angka na asing na porlu parsiajaronta sian hinauli ni bangso Batak on.

“Sahata dohot Saroha” ima na ingkon sipeoponta di rohanta be ala hita nama saonari jala hita do haduan. Hita nama na maniop jala manontuhon songon dia langka ni Bangso on tu joloan on. Dang holan Bangso Batak rupani, hamajuon ni Negara on pe hita ganup do manontuhon i. Marhite-hite hinadenggan ni ulaon “Marsiadap Ari” sai anggiat ma boi hita patuduhon parsaoran na uli jala boi sahata jala saroha tu angka ari na mangihut.

Bona Ni bagot naung mabaor
Alai sai tong dope margaba-gaba
Beta hita luhut marsaor
Sahata Saroha Immada

Penulis: Jepri Mardaup