Sampul Buku Tarombo Simataraja V.1.0
Sampul Buku Tarombo Simataraja V.1.0
la Ompunta Raja Simarmata ima : pomparan ni Ompu Raja Naiambaton (PARNA), jala torsana songon naditoru onOMPU RAJA NAIAMBATON : Anakkonna 5 anak baoa, jala sada sian anak na 5 i, ima Ompu Saragi Tua.OMPU SARAGI TUA : Anakkonna 2 anak baoa, i ma 

  1. Ompu Tuan Binur
  2. Saragi

OMPU TUAN BINUR

Dungi mangoli ma Ompunta Ompu Tuan Binur to boru ni Hula-hula i Raja Manurung namargoarhon Bunga Ria Boru Manurung namaringanan di tano Sihotang (Negeri Sihotang).

Dungi mamungka huta nahot ma Ompunta Tuan Binur di Rianiate namargoarhon HUTA NAMORA, jala gabean, Laos Raja do di nahumaliang i. Dipasaut Ompunta Mulajadi Nabolon (Amanta Debata) do pangidoan ni Ompunta Doli Ompu Tuan Binur dohot Ompunta Boru Manurung ima Namandapot 4 (opat) anak baoa dohot 2 boru namarhasohotan to Sihotang Marsoit dohot to Limbong naopatpulu.

Goar ni anak na 4, ima

  1. Lango Raja
  2. Saing Raja
  3. Mata Raja
  4. Deak Raja

MATA RAJA onma Ompunta namargelarhon OMPU SIMATARAJA RAJA SIMARMATA

Ditingki marujung ngolu Ompunta Tuan Binur, jala marnadeak do Ompunta boru Manurung na disiubeonna.

Jala Ompunta Simataraja ima jolma paralamat, nabarani, namalo jala natang marroha, dibahen Simataraja do sada sungkun-sungkun tu hahana nadua ima Lango Raja dohot Saing Raja manungkuthon alamat dohot nanimatahonna taringot namarnadeak Ompunta Boru Manurung tininggalhon ni Ompunta Doli Ompu Tuan Binur Raja Nasangap i. la alus sian hahana naduai, molo anak do nanideakhon ni Inanta rap maranggi ma hita tu ibana, alai molo boru do rap ma hita mariboto alai Anak do nasorangi. Dung sorang dibahen ma goarna Deak Raja ima Raja Siampudan anak paiopat ma ibana. Disada tingki dung balga ibana jala tang marroha Si Deak Raja, Si Mataraja mambahen sada punguan dinasida naopat, laho manangkasi Torsa-torsa ni Adat si Raja Batak dohot parjambaran :

Asa manat mardongan tubu
Elek marboru
Somba marhula-hula 

Jala patotahon bagian napinungka ni Amana dohot napinungka ni Ompu na Saragi Tua na adong di tano Tamba, dapot ma rim ni tahi dohot dosniroha jaia borhat ma Simataraja ima jolma partahi jala paralamat na sintong i mandapathon napinompar ni Ompu Tamba Tua di tano Tamba, disi ma didapot :

  1. Sitonggor Dolok,
  2. Sitonggor Tonga-tonga,
  3. Sitonggor Toruan

Dungi mambahen sise ma nasida natolu haroro ni Simataraja, jala ro ma alus sian Simataraja: Horas ma jala gabe disise ni hamu dongan tubungku. Ianggo harorongku ima manungkun taringot napinungka ni Daompung Saragi Tua na adong di tano Tamba on.
Jadi dialusi nasida natolu ma sungkun-sungkun i, ima; Ianggo napinungka ni Ompunta Saragi Tua adong ditano Tamba on. Dung piga-piga ari laho nasida natolu dohot Simataraja tu Golat na adong ditano Tamba, laos dibahen nasida ma sada janji, songon on: Patotahon Golat, ima bagian ni pinompar ni Tamba Tua dohot bagian ni Saragi Tua. :

  1. Bagian ni Tamba Tua, ima Golat ni Sitonggor Dolok, Sitonggor Tonga-tonga, dohot Sitonggor Toruan.
  2. Bagian ni Saragi Tua, ima jadi Golat ni Simataraja nagabe tano na hot ditano Tamba

Disada tingki dipatupa nasida naopat ma sada Bius Bolon patotahon Adat dohot Parjambaran Si Raja Batak, songoni mardongan tubu, nang mar boru dohot mar Hula-hula. Disada tingki dititi nasida sada ari nauli, bulan nadenggan taon nagok di Ruji-ruji ni Si Raja Batak nalaho mangalahathon sada Horbo sitingko tanduk, sijambe ihur, siopat pusoran, namalo mangarege di tonga ni alaman, patuduhon barita gabe dohot barita horas ima: horbo bius siopat kae lao parjambaran ni nasida na opat :

  1. S i Tonggor Dolok,
  2. Si Tonggor Tonga tonga,
  3. Si Tonggor Toruan,

Simataraja

Jala digokkon do pomparan ni Si Raja Naiambaton (Parna) humatiang tano Tamba ima natinggal di Pulo Samosir, tarlumobi nasian Saragi Tampak.

Dimasa ni ulaon Bius Bolon i, tarbege jala tarbarita ma sasude Raja dohot utusan namangadopi Horja i, ia Simataraja ima partahi jala paralamat dohot Ulubalang nagogo. Mulai sian i ma ditanda jala diparate-atehon natorop i Simataraja sada jolma partahi jala paralamat nasintong. Jala ditingki ulaon i ma dipasahat Saragi Tampak pangidoanna, paboahon naung adong sada gora naniadopan ni nasida mansai jorbut, ima: gora marsitabanan Rahutbosi / Simanindo dohot Simalungun, Turnip-Siallagan dohot marga naasing di Rahutbosi maralohon marga Purba nasian Simalungun. 

Dung piga-piga ari ro ma muse pangalapi sian Simanindo sian Turnip-Siallagan jala mamboan sada Hoda Sigajanabara songon togu-togu ro tu Simataraja, jala Simataraja paboahon naro pangalapi dohot gora namasa i tu dongan tubu natinggal di no Tamba ima Sitonggor Dolok, Sitonggor Tonga-tonga doho Sitonggor Toruan. Jala dung mangkatai nasida, dos ma tahi dohot rohani pangalapi ni Turnip-Siallagan taringot tu Simataraja, borhatma nasida tu Rahut Bosi Simanindo. Dinasahat nasida ditano Simanindo, ima Simataraja dohot na mangalapi Turnip-Siallagan, jadi marolop-olop dohot mar horas-horas ma Haha-Anggi dohot Paniaran nasida dihasasahat ni Simataraja partahi jala Ulubalang nagogo.

Sada ari nagok dibahen nasida ma angka sungkun-sungkun songon napaboahon sada najorbut namasa ditingki i nanialaman ni Turnip-Siallagan, ima na ro parmusuon ni Purba nasian Simalungun.

Jadi dialusi Simataraja ma nasida; Hamu dongan tubungku narade doahu mangoloi, alai tabahen sada janji, mulai sadari : on asa rade hamu ganup dohot paniaran dibagasan pitu ari on ima; mamiu tali ijuk sampe sungkup mangalo musunta, alai pintor dialusi Turnip-Siallagan ma, narade ma hami Ampara si Doli. Dung sahat pitu ari namamiu tali ijuk i, dipasingot Simataraja ma dongan tubuna dohot paniaran, Ima: Hamu sasude dibagasan 7 (pitu) Ari on, asa unang hamu haruan sian bagasan Huta on.

Mulai sian i ma dibahen Simataraja tingkina laho patureho Halak-halak (orang-orangan) tung mansai jorbut idaon ni musu sian nadao manang sian Tao ni Rahut Bosi.
Jala dipampajokkon ma halak-halak on ditao i mulai sian tao ni Rahut Bosi sahat tu tao ni Simanindo, laos dibahen do sude Halak-halak on martali ijuk sipatogu-togu on, jala dipajokkon dibagasan borngin alai diduduk molo laho tiur ni ari Disada tingki roma musu mandapothon Tao ni Rahut Bosi nasian Simalungun dibagasan borngin.

la Simataraja pe tung mansai jaga do, jala manat mamparate-atehon, huhut do ibana marlangei. Dung jonok musui tu Halak-halak najorbut i, laos ditogu Simataraja do tali i songgot situtu, jala musui marsironsangan, jala adong na harom.
Ima sada tingki hamonangan ni Simataraja namanjalo togu togu ro sian Turnip-Siallagan, jala mulai sian i ndang hea ro be musu ni nasida, jala nasida sonang so haribo-riboan.
Jala disada tingki dibahen nasida ma Pesta Nabolon, namandok mauliate tu Mulajadi Nabolon (Debata), songon i nang tu Simataraja napatuduhon balga ni roha nasida dohot lasni roha dibagasan Hamonangan, ala malua sian gora mansai jorbut, namargoar: Marsitabanan huta dohot huta na asing. Jala laos dipestai ma dibahen nasida pangidoan dibagasan elek-elek to Simataraja asa rap nasida mangingani Rahut Bosi.

Alai alus sian Simataraja, mauliate ma Amang didenggan ni rohamu naeng rap hita di Rahut Bosi on, alai dumenggan ma hita pabolak ingananta be. Jala ahu dompak anggoni/dangsi na ima tano Simarmata goarna nuaeng, namarparbalohan Sigurgur dohot tano Sidaji sian pasir sahat tu dolok si Gornang dohot Sanggar na Langlang goarna nuaeng.

Dung marsipaoloan nasida Simataraja dohot Turnip-Siallagan, laos maringanan ma Simataraja di tano Pangondolan goarna nuaeng, namarlapatan ondolanna parjolo dung diririti tano nanitodo ni rohana.

Jala dung piga-piga ari borhat ma ibana dompak dolok paresohon, jumpa ibana ma sada Aek na tubu sian garda ni Robean i ma Aek Si Gornang.
Jala manatap ma ibana dompak Pasir Tao Toba tung mansai uli jala dengan idaon ni Mata, laos sonang rohana.
Dungi disi ma dipingkiri Simataraja asa adong Pandonganina, ala tarida ibana sian dolok si Gomang tu Limbong Mulana, jala taringot tu rohana Boru ni Tulang Raja i Ompu Soudakkal Limbong Sihole.

Dinaborhat Simataraja tu tano Limbong Mulana, sahat ma ibana di panguli (gijang ni ari) di Huta/Jabu ni Rajai, laos marsijalangan tangan ma nasida dohot Tulangna Doli dohot Inanta Boru, jala dibahen ma sungkun-sungkun tu Simataraja tariongot harorona tu Limbong Mulana. Jadi alus sian Simataraja, namasihol do ahu mida hamu Amang dohot Inang, nang Laek ku alai tarlumobi ma Paribanhu.
Dung i didok Amanta Doli ma: Molo boti, sihol gabe jala sihol horas ma i tutu, laos didok Inanta Boru ma tu Simataraja laho ma jolo Damang martapian tu Aek Parhutuan jala aek si pitudai, ai tung loja Damang sian pardalananmu.

Alai dinamarhobas Simataraja laho martapian tu aek sipitudai, nunga diparate-atehon si Lahatma Boru ni Rajai, jala laho borhat manjoloani tu aek sipitudai. Jadi borhat ma Simataraja laho martapian, ai nanaeng sahat ibana tu aek i, nunga haruar Boru ni Rajai mamboan aek sitio-tio dibagasan panguhatan. Jala Simataraja pajonok diri na laos marsalaman pasahat sihol tu boru ni Raja i, laos di si ma disungkun Boru ni Raja i haroro ni Simataraja.

Alai alus sian Simataraja : Namangelek ma ahu tu ho Boru ni Rajanami, anggiat olo ho pandonganingku. Jala ahu maralamat tu ho namaboan aek sitio-tio dibagasan panguhatan diatas loman-loman na hot, jala donganku dohot dongan ku horas mai.

Alai alus sian Boru ni Rajai, sar jala pur do adu-adu tu tano Limbong Mulana nang tu Damang parsinuan nang tu Dainang pangintubu, ia Simataraja ima jolma pangurupi, paralamat partahi jala Ulubalang nagogo. Sahat ni Barita on sian Amang Boru Raja Siallagan natinggal di Saragi Tampak. la alus sian ahu ima dipangidoanmu dohot elek-elek mu, Na olo do ahu donganmu gabe, jala donganmu horas. Jala tangkas do paboaongku tu Damang dohot tu Dainang pangintubu dipangidoanmu nang dielek-elek mu.

Jala alus sian Simataraja, mauliate ma di ho boru ni Raja nami tarlumobi di Mulajadi Nabolon (Debata) napadomuhon sangkapta nadua.

Alai manigor mulak do boru ni Rajai paradehon sipanganon di Simataraja dinamulak martapian sian aek si pitudai. Jala di Pansur na ditoru do ibana martapian, dungi mulak ma ibana sian tapian i, laos ro ma hata sian Inanta Boru tu Simataraja asa mardaonpogu ma Damang.

Dung sidung mardaunpogu, ro ma sungkun sian Rajai Ompu Saudakkal Limbong Sihole tu Simataraja taringot boa-boa sian boru ni Rajai, ima naung dos tahi ni nasida nadua dipangoloi ni si Lahatma tu Simataraja dongan na gabe, jala dongan na horas.

Jadi ro ma hata ni Amanta Doli tu Simataraja dohot tu si Lamatma, ima : Asa hot dijanji jala hot dipadan, jala sadari on ma titionku ari parsaut muna dirajahon: Ari nadenggan dohot bulan nadenggan. Jadi mulak ma Simataraja paboahon tu Natorasna dohot tu Haha-Anggina dohot tu ibotona/Laena, ima natinggal di Huta Namora, ima: Taringot naung marjanji jala marpodan Simataraja dohot Pandonganina Si Lahatma Boru Limbong Sihole. Boru ni Raja i Ompu Saudakkal sian Limbong Mulana. Laos dipaboa taringot hata ni Rajai, ima laho pasahathon Adat manang mambahen Adat na gok.

Alai alus sian Haha-Anggina, mansai denggan, jala disada tingki naung binuhul ni Rajai sian Limbong, borhat ma nasida Inanta boru Manurung, Simataraja, dohot haha-anggina, ibo tona/laena nadua i, dohot sude dongan tubuna samamboan sipanganon Adat nagok tuhuta ni Hula-hula i tu Limbong Mulana huta Sihole.
Dinasahat nasida, dijabu ni Raja i Ompu Saudakkal Limbong Sihole, didapot nasida dibagas huta i tung mansai torop na jinou ni Rajai, i ma: 

Dongan tubuna,
Boru dohot pargellengonna,
Hula-hula na.

Saut ma Simataraja dohot si Lahatma boru Limbong Sihole dipasu-pasu Raja Bius Limbong Mulana, laos dipasahat ma sude nasa sinamot tu Rajai.
Dung sidung ulaon i, laos disadari i do nasida mulak tu huta nasida ima huta Namora rampak dohot parumaen naniadathon i.
Jala dipaborhat Rajai Amanta Doli dohot Inanta Boru, suang songoni nang Haha-Anggi ni Hula-hula i.
Dinasahat nasida dihuta Namora dibahen nasida do Parpunguan diharoro ni parumaen nabaru i.
Jala dung piga-piga ari dibahen ma sada tingki pangkataion tu Ompunta boru Manurung dohot Haha-Anggina, Lae dohot Ibotona.

Napaboahon asa mulak Nasida Simataraja dohot Lahatma Boru Limbong Sihole tu Saragi Tampak di tano naniririt na hian.

Laos ditingki parpunguan pangkataion on ma dipasahat Simataraja bagianna nasian napinungka ni Amanta Ompu Tuan Binur na di Tahuan/Pangururan tu Anggina Si Deak Raja.

Di ida jala mangkilala do Ibotona nomor dua namuli tu Limbong Naopatpulu dipanarihon dohot dipangurupion ni Simataraja dianggina si Deak Raja, gabe dipasahat Ibotona i ma pasu pasu mamandok, ima: “SAI TOROP MARIBUR MA PINOMPAR NI SIMATARAJA SONGON RIHIT NADITOPI NI TAO (LAUT) JALA DAPOTAN SIPANGANON NA LOMAK DO HOT MUAL NATIO”.

Jadi Ompunta Boru Manurung pe mangalehon sada Horbo namargoarhon: “HORBO PARTOGI DALAN” ima Horbo na asing sian sude horbo na adong dihumaliang na, laos dohot do horbo on diboan Simataraja. Jala dipasu-pasu Ompunta Boru Manurung ma anak na Simataraja.

Dung i borhat manang mulak ma Simataraja dohot Boru Limbong Sihole jala dipataru tu huta inganan nasida ima di Pangondolan na ditano nadigoari: “NEGERI SIMARMATA” Bona pasogitta Pomparan Ompu Simataraja Raja Simarmata.
Dinasahat nasida di Pnagondolan di Bale-bale naung pinatupa ni Simataraja hian, dibahen nasida do sada Parpunguan las ni roha.
Jala dung piga-piga taon gabe ma nasida, dibasa-basahon Mulajadi Na Bolon (Debata) ma Anak Buha baju namargoarhon:

  1. Anak Siangkangan : Halihi Raja,
  2. Anak Paduahon : Dosi Raja,
  3. Anak Patoluhon : Datuktuk Raja.

Disada tingki marsitopotan ma nasida namarpariban jala namardongan “Tubu”, mangkata-hatai nasida Inanta Namarpariban ai inganan nasida napanjonok-jonok jala tongtong narampak mangkasuhuthon molo masa ulaon gabe nasida na 3 (tolu) marsitambolan, ima : Simataraja, Raja Turnip dohot Raja Siallagan. Songoni ma tabona dohot rapat ni namarpariban, di bahen Inanta Namarpariban on ma sada janji songon padan dinasida, (songon on): Molo masa ulaon di Simataraja, Turnip – Siallagan ma panambolina, laos sangoni marganti-ganti dinasida, jala na so boi oseon, ima ditorushon angka pomparanna be sahat tu nuaeng on.

Jala Iboto ni Ompunta Boru Lahatma Boru Limbong Sihole, ima: Tulangta namargoar Ompu Niantarbosi Limbong Sihole, jala 3 (tolu) namarpariban, ima: Ompunta Lahatma Boru Limbong Sihole nanialap ni Ompunta Simataraja ma Siangkangan, Nanialap ni Naibaho Sitangkarain ma namardua, nani alap ni Raja Turnip ma sinomor tolu natinggal di Simanindo. Alai Boru Limbong Sihole nanialap ni Raja Siallagan ima Namboru nasida Ompunta Lahatma Boru Limbong Sihole.

Jadi dung piga-piga taon leleng na anakkon Ni Ompunta Simataraja Anak na 3(tolu) i, bolon ma pamatang na jala tang marroha, dipangolihon ma : 

  1. Halihi Raja tu Inanta Naolo Boru Sihaloho Sinapuran sian Janji Maria Parbaba.
  2. Dosi Raja tu Inanta Bungahom Boru Malau sian Rianiate.
  3. Datuktuk Raja tu Inanta Tiarma Boru Sinaga Uruk sian Datu Upar Urat.

Dungi marianakkon na Ompunta na tolu i, jala mamompari sahat ma tu tingki on sundutlsilsilah na, lobi hurang ima :

  1. Sundut sian : Halihi Raja :+ 16 sundut.
  2. Sundut sian : Dosi Raja :+ 17 sundut.
  3. Sundut sian : Datuktuk Raja :+ 15 sundut

Jala molo boi disusun be ma tarombo sundut/silsilah na, ganup namarhala­hla-anggi Ompunta, jala dipasahat tu Pangurus Pusat Punguan asa diboanhon muse tu Seminar Manang manontuhon Nomor silsilah songon naniaturhon nadiatas on, asa jumpang hormat-menghormati diparhundul dohot di paradaton manggalang satu kesatuan dibagasan Punguanta, namang ihuthon angka tona ni Ompunta naparjolo.
la Ompunta Simataraja dung marpinompari angka Anakkon na, dipatupa do sada Panggomgomion mangaturhon Adat, nadigoari: RAJA BIUS SIMARMATA dung jumolo dibahen marhuta/margolat Anak na tolu, ima :

  1. Siangkangan : Halihi Raja, Hutana ima Huta Uruk
  2. Sibitonga : Dosi Raja, Hutana ima Huta Toruan
  3. Siampudan : Datuktuk Raja, Hutana ima Huta Balian

Diganup-ganup Huta on adong: Raja Huta nadigoari Raja Jolo. Diari naparpudi dung Saur Matua Ompunta Simataraja, ala Anakkonna do tong hot Raja Huta di Bius Simarmata dibahen ma goar na, ima:
“RAJA BIUS SIMARMATA SITOLU TALI”
Jala Torsa Panggomgomi Raja Adat songon naditoru on, ima:

Raja Jolo:
Raja Sitolu Tali : Huta Uruk, Huta Toruan, Huta Balian. Ima namanotophon Haputusan

Raja Doli:
Panimbang dohot mambahen haputusan.

Raja Dapoton:
Panungkunan

Pandebolon:
Pangkata i manang Jurubicara

Guru Taon:
Paramalan (paralamat) 

Parsidung Bolon:
Parbinoto diparngoluan Taon/Par binoto diulaon.

– Pangolo-oloan
– Raja Goraha Mangkobasi Ulaon
– Boru Bius
Raja Bius on ma namartoguan tongtong di Toguan on, manimbangi angka ulaon dibagasan sada ni roha. Molo maramal laho ma tu Pangondolan, jala molo mambahen Pesta Bius Simarmata di Parbiusan ma inganan na. Songon i ma partonding na dibahen ni angka Ompunta Naparjolo i diangka siulaon na, jala nanaeng siihuthonon ni pomparan na dipudian ni ari.

Songoni ma jolo naboi dipatupa hami Torsa-torsa Tarombo ni Ompunta Ompu Simataraja Raja Simarmata, molo adong na hurang lobi, rampak pandengganhon hita. Jala mungkin adong nahurang susunan hata-hata na dohot kalimatna, jumolo hami mangido maaf.
Jala songon hata umpama ni sijolo jolo tubu, mandok :

Ompunta nadijolo, martungkothon sialagundi, Angka ulaon nadenggan nadibahen Ompunta naparjolo, I do siihuthonon ni hita naparpudi. 

Eme ni Tamba tua, parlinggoman ni si Borot
Tuhanta Debata do namartua, Horas hita diparorot.
Sahat-sahat ni Solu. 
Sahat tu bontean ni Tigaras,
Sahat tapestahon jala taresmihon tugu,
Saur ma hita mangolu jala Horas-horas-horas !!!!!!!!!!!

Komentar Anda